Balade 83 : Qui veult vivre paisiblement (LXXXIII)
Balade
Qui veult vivre paisiblement
Sanz avoir peril de son corps,
Si ait gueule comme oliphant,
Et com taupe les oeulx dehors,
5 Et noie ne c’uns harens sors
S’il veult son corps et biens garder,
Et face ainsi com s’il fust mors,
Sanz veoir, oir ne parler.
S’il oit de nulli parlement
10 De toulte, d’injure[1] ou de tors,
Face com le saiges serpent,
Estoupe ses oreilles lors,
Ne die mot pour les rappors
Mauvais, trop lui pourroit grever.
15 Et soit en Dieu ses reconfors,
Sanz veoir, oir ne parler.
Et s’il veoit aucunement
Mauvestiéz aux foibles des fors,
Faire, seufre paciemment.
20 Aux .xv. vins soit ses ressors :
S’on lui dit : ― Vois tu riens ? ― Je dors.
Sinon pour la vielle cesser
De rien dire, et en soit recors,
Sanz veoir, n’oir, ne parler.
L’envoy
25 Princes, ne puet avoir tresors 19d
Au jour d’ui, ne terre acquester
Aucuns, s’il n’est sires trop fors,
Sanz veoir, oir, ne parler.
[1] Ms. injures