Balade 82 : Ou hault sommet de la haulte montaigne (LXXXII)

Balade

                   Ou hault sommet de la haulte montaigne
                   Ne fait pas bon maison edifier,
                   Que le grant vens ne la gaste et souspraingne.
                   Ne ou bas lieu ne la doit pas lier :
5                 Car par eaues pourroit amolier
                   Le fondement et perir le merrien.
                   Nulz ne se doit ne hault ne bas fier :
                   Benoist de Dieu est qui tient le moien.

                   Es grans estaz est haulte honeur mondaine
10               Qu’Envie tend par son vent trebuchier.
                   Et la s’endort chascuns en gloire vaine,
                   Mais en ce cas chiet honeur de legier :
                   Du hault en bas le convient abaissier,
                   Et lors languist quant il dechiet du sien.
15                Telz haulz estas sont de foible mortier :                         19c
                   Benoist de Dieu est qui tient le moien.

                   Ou lieu trop bas qui est assis en plaine
                   Ne se doit nulz tenir pour mendier,
                   Car povreté est reprouche certaine,
20               Et si n’est homs qui vueille au povre aidier.
                   Fay ta maison en un petit rochier
                   Ne hault ne bas, et la vivras tu bien :
                   En tous estas vueil dire et enseignier :
                   Benoist de Dieu est qui tient le moien.