Balade 81 : Puis que je voy né le fil de l’enfant (LXXXI)

Autre Balade[1]

                   Puis que je voy né le fil de l’enfant,
                   Selon les diz et exposicions
                   Des Prophetes, et Sebille qui sant
                   Par esperit les grans evancions[2],
5                 De ce monde les tribulacions
                   Doivent fenir, et soubz le petit né
                   Doit [re]flourir saincte religions,
                   Qu’ainsis est il pieça predestiné.

                   Fleur qui de fleur pure et nette descent,
10               Sera de Dieu la vraie elections                                       19b
                   Qui doit porter son ceptre en Orient.
                   Du remenant des persecucions,
                   Du regne saint sa consecracions
                   Jerusalem la sera couronné
15                Et soubmettra paiennes nascions,
                   Qu’ainsi est il pieça predestiné.

                   O lui sera un saint pappe Innocent,
                   Et soubz ces deux, la reformacions
                   Des crestiens sera forte et puissant :
20               Craindre[3] la loy et les dissencions
                   N’aront plus lieu, et nous esjouissons,
                   Car asséz tost seront noz maulx finé,
                   Les grans pecheurs et leurs intencions.
                   Qu’ainsi est il pieça predestiné.

                   L’envoy

25               Princes, je voy le nom du nom naiscent,
                   Et l’innocent de l’innocent cliné
                   Qui doit regner sires sur toute gent,
                   Qu’ainsi est il pieça predestiné.

[1] Pièce identique au f° 269 sous le n° MXX

[2] Saint Hilaire corrige en avancions.

[3] Saint Hilaire corrige en Craindront