Balade 80 : Pourquoy viens tu si po a court ? (LXXX)

Autre Balade       19a

                   Pourquoy viens tu si po a court ?
                   Qui fuit la court, la court le fuit.
                   ― Pour ce qu’il y fault estre sourt,
                   Et sanz veoir ne que de nuit,
5                 Estre muyaux. Parler y nuit.
                   Or voy, or oy bien et parole :
                   Par ces trois poins sont maint destruit :
                   Je n’ay cure d’estre en geole.

                   Qui dit voir, nul ne le secourt,
10               Qui voit trop cler, l’en le deffuit.
                   Qui voit et entent, sur lui court
                   Chascuns, lors sera mis en bruit.
                   Li soulaulx fault, la lune y luit
                   Tenebreuse, la se rigole.
15                Tenéz vous y toutes et tuit :
                   Je n’ay cure d’estre en geole

                   Car je voy qu’a ces oiseaulx sourt
                   En geoles po de deduit.
                   Ilz sont tenuz crepes et court.
20               Ceuls qui ont des champs le conduit
                   Vivent frans. Franchise les duit,
                   Et l’angeolé pas ne vole,
                   Qui pour yssir hors se deruit :
                   Je n’ay cure d’estre en geole.