Balade 79 : Puissans deffaillans de puissance (LXXIX)

Autre Balade

                   Puissans deffaillans de puissance,
                   Saiges ou il n’a point de sens,
                   Vaillans qui default de vaillance,
                   Orgueilleus d’orgueil deffaillans.
5                 Riches de richesces faillans,
                   Qui dois par nature pourrir,
                   Corps corrumpable et corrumpans.
                   Advise qu’il te fault mourir.

                   Au naistre cries la pesance
10               Du monde, et si n’es innocens :
                   Toy et ta mort tantost commence.
                   Tes aages est briefs et pesans
                   Qui ne puet passer .lx. ans,
                   Et encor est ce au mieulx venir,
15                Et les pluseurs muerent enfans :
                   Advise qu’il te fault mourir.

                   Certaineté n’as en science,
                   Tu n’es en force permanens,
                   En seignourie, en eloquence,
20               En richesce : ce n’est que vens
                   Du monde qui est decevens.
                   Tantost te fait la mort fenir.
                   Ou est Oliviers et Rolens ?
                   Advise qu’il te fault mourir.

                   L’envoy

25               Princes, qui fait bien des s’enfance,
                   Sanz mal et sanz enorgueillir,
                   Saiges est, qui a la fin pense :
                   Advise qu’il te fault mourir.