Balade 77 : Le temps est tel et deça et dela (LXXVII)

Autre Balade

                   Le temps est tel et deça et dela
                   Qu’a nul ne chault du bien de son voisin.
                   Quant il espart ou tonne, on crie : en la !
                   Chascun chace le temps en autre lin.
5                 Mais je ne voy ne Gautier, ne Colin,
                   A court n’ailleurs qui s’empesche d’autrui,
                   Ne qui cure ait de parent ne cousin :
                   Chascuns ne pense au jour d’ui que de lui.

                   Si juesnes n’est qui ne demande ja.
10               Les enfans sont de convoitier enclin :
                   Leur nature de fort heure changa,
                   Signifiant de ce monde la fin.
                   Les anciens sont de dolent afin,
                   Car ilz ne sont honouréz de nullui.
15                Guerdon de fang : tuit viennent ce chemin :
                   Chascun ne pense au jour d’ui que de lui.

                   Charité fault, toute joie s’en va.
                   On n’a cure de clerc ne de latin,
                   D’omme vaillant : la science faurra.
20               Prouesce, honeur, la loi vont a declin.                            18c
                   On ne les voit mais, fors en parchemin.
                   Du temps qui court trestous esbahiz sui :
                   Face qui puet, qui non voist au moulin :
                   Chascuns ne pense au jour d’ui que de lui.

                   L’envoy

25               Princes, saige[1] est qui ci regardera,
                   Pour lui oster de tristesce et d’ennuy,
                   Et qui en paix du sien vivre pourra :
                   Chascuns ne pense au jour d’ui que de lui.

[1] Ms. saiges