Balade 76 : L’entendement est de l’ame salus (LXXVI)

Autre Balade

                   L’entendement est de l’ame salus,
                   Et des vices le souverain regart.
                   L’entendement est garde des vertus :
                   Par ce mirouer, homs des maulx se depart,
5                 Les vices fuit, aux biens trait de sa part.
                   C’est le desir de bonne renommee.
                   Que qui la suit, il sera, tempre ou tart,
                   Homs glorieus de fait et de pensee,

                   Se sanz faintise est aux biens entendus,
10               En gouvernant par bon et bel esgart.                             18b
                   Mais s’il se fait, d’infame yert confundus,
                   Car gouverner doit chascun par bon art,
                   Et seignourir. Sapience est l’espart
                   De mal fuir, d’estre bonne nommee.
15                Qui l’ensuivra, il est, se Dieu me gart,
                   Homs glorieus de fait et de pensee.

                   Gouvernement de soy est presque nuls
                   Se renoms n’est qui en maint lieux s’espart,
                   Et pour ce sont des saiges maintenus.
20               Qui autrement le fait, il est coquart.
                   Et dit on lors que par envie s’art
                   Qui lors lui est par renom destinee.
                   Quiere bon nom, voist Faintise a la hart,
                   Homs glorieus de fait et de pensee.