Balade 75 : Quant j’ay veu tous les estas qui sont (LXXV)

Autre Balade

                   Quant j’ay veu tous les estas qui sont,
                   Il n’est servir fors a Dieu seulement :
                   Uns homs d’armes se destruit et desrompt
                   De faim, de froit, de gesir durement.
5                 Il dure pou, il peche horriblemnt,                                   18a
                   D’ame et de corps en [trop] grant doubte vit.
                   Cilz qui sert Dieu dure plus longuement :
                   Servir a Dieu est regner, si c’om dit.

                   Riches mondains jamais ne cesseront
10               Fors d’acquerir a paine et a tourment.
                   Les mariéz pour leurs enfans se font
                   Las et chetis. Li marchant ensement
                   Et laboureur ont moult de froissement,
                   Et son enfin pour leur avoir maudiz.
15                Religieus vivent bien autrement :
                   Servir a Dieu est regner, si c’om dit.

                   En leurs moustiers et en leurs cloistres vont,
                   En servant Dieu y quierent sauvement.
                   De leurs abbéz et de leurs prieurs ont
20               Vivre, vestir et leur gouvernement,
                   N’affaire n’ont rien terriennement
                   Fors de penser a leur povre esperit.
                   Qui tel vie a eureus est vraiement :
                   Servir a Dieu est regner, si c’om dit.

                   L’envoy

25               Princes, qui veult faire son sauvement
                   Rende s’a Dieu, saint Poul ce nous descript.
                   Le monde laist. Car, a mon jugement,
                   Servir a Dieu est regner, si c’om dit.