Balade 74 : Qui au jour d’ui veult a court demourer (LXXIV)

Autre Balade

                   Qui au jour d’ui veult a court demourer,                        17d
                   Avoir estat et estre chier tenu,
                   Aux grans seigneurs fault leur[1] bon acorder.
                   Et bien se gart qu’il n’ait riens retenu
5                 De Verité, s’il ne veult estre nu.
                   Car qui la dit, le temps est que[2] mendie.
                   Ait avec lui, pour estre riche et dru,
                   Condicion de ribault et de pie.

                   Car il ara grace par fort jurer,
10               Par regnier les sains et leur vertu,
                   Par bordeler, par ferir, par venter,
                   Par voire aussi. Qu’il ait le bec agu
                   Comme pie, qu’il se soit maintenu
                   A bien jangler : a ce poins estudie,
15                Estat ara : ait lors, pour son escu,
                   Condicion de ribaut et de pie.

                   Lors prandra l’en plaisir en son parler,
                   Et entre touz sera le mieulx amé.
                   S’autrement fait, il n’y pourra durer,
20               Car on y tient saige homme malostru.
                   Saiges, preudoms, ne vaillans un festu
                   N’y conquerront avoir, jour de leur vie.
                   Et vil chose est d’y avoir, m’entens tu ?
                   Condicion de ribault et de pie.

                   L’envoy

25               Princes, qui veult en bon renom regner,
                   Estre prodoms et mener nette vie,
                   D’entour lui doit ceuls qui ont rebouter
                   Condicion de ribault et de pie.

[1] Ms. tout leur

[2] Ms. qui