Balade 71 : Phisicien, comment fait Droit ? (LXXI)

Balade

                   Phisicien, comment fait Droit ?
                   ― Sur m’ame, il est en petit point
                   […][1]
                   ― Que fait Raison ? ― Fievre la point,
5                 N’est remede que om[2] lui doint.
                   Perdu a son entendement,
                   Elle parle, mais foiblement,
                   Et justice est toute ydiote :
                   En eulx n’a nul bon jugement.
10               ― Vous me chantéz mauvaise note.

                   J’ay grant merveille que ce doit,
                   Ne qui leur a ce mal empoint.
                   ― Descongnoissance et le vent froit
                   De Convoitise, qui se joint
15                A Foul Vouloir, leur vray adjoint,
                   Ceuls les tourmentent durement,
                   Et ne leur laissent nullement
                   Avoir fors que plait et riote,
                   Sanz donner nul allegement.
20               ― Tu me chantes mauvaise note.

                   Mais je sçay bien qui les garroit.
                   ― Et qui ? ― Trois qui sont bien conjoint :
                   Congnoissance, s’elle y venoit,
                   Verité, dont on n’use point
25               A present, et Pitié qui vaint
                   Les cuers felons communement :
                   Ceuls feroient legierement
                   Ressoudre ces trois d’une flote.
                   ― Par Dieu, tout yra autrement.
30               ― Vous me chantéz mauvaise note.                                 17b

                   L’envoy

                   Princes, vous estes droictement
                   Le medicin, et qui bien note,
                   Se pourveu n’y est temprement,
                   Vous me chantéz mauvaise note.

[1] Vers manquant

[2] Ms. qu’om