Balade 70 : Uns paisans ot un mastin (LXX)

Autre Balade

                   Uns paisans ot un mastin
                   Josne, qui le servit long temps.
                   Aux loups faisoit moult de hutin,
                   Et gardoit ses brebis aux champs.
5                 Venoisons prenoit et cerfs grans,
                   Et si gardoit l’ostel par nuit.
                   Lors l’ama moult li paisans.
                   On est amé tant c’om fait fruit

                   Mais la viellesce vint en la fin
10               A ce chien, si devint pesans,
                   Car fait avoit maint dur chemin.
                   Lors fut a son maistre chargans.
                   Batre le fait a ses sergens,
                   Et dist que cilz vieulz chien lui nuit.
15                Les juenes fut adonc prenans :
                   On est amé tant c’om fait fruit.

                   Lor dist Rounel en son latin :
                   ― J’ay esté tout mon corps usans
                   A vous paistre de maint lopin,
20               Garder l’ostel, femme[1] et enfans.
                   Ce me deust estre secourans,
                   Mais remuneracion fuit :
                   Soiéz tuit a ce regardans :
                   On est améz tant qu’om fait fruit.

                   L’envoy      17a

25               Princes, mains sont aux cours servens
                   De pieça que viellesce cuit.
                   Les nouveaulx boutent hors telz gens :
                   On est amé tant com fait fruit.

[1] Ms. femmes