Balade 69 : Doit bien amer un seigneur son servant (LXIX)

Balade

                   Doit bien amer un seigneur son servant
                   Qui en tous cas lui acorde son bon,
                   Dont hais est et diffaméz souvent ?
                   ― Certes, nenil. Car il destruit son nom
5                 Se mal consent, c’est conseil de felon :
                   Car uns prodoms doit conseillier tout bien
                   A son seigneur. Le contraire voit on,
                   Car chascun dit : « Monseigneur dit trop bien. »

                   Tel consenteur ont honni maint enfant
10               Desquelz ilz ont plumé le pelisson,
                   Pour gre avoir du foul consentement,
                   Estre pres d’eulx et recevoir guerdon
                   Du mal conseil, et d’autrui prandre don,
                   En reboutant des loiaulx le merrien :
15                Perduz en sont maint prince et maint baron,
                   Car chascun dit : « Monseigneur dit trop bien. »

                   Qui prodoms fust, en leurs maulx pugnissant
                   On les feist estre de bon renon.
                   Aises fust lors soubz eulx la povre gent,
20               Et que flateur, menteur, ribault, garçon,
                   N’eussent plus lieu, ne n’oissent leur son,
                   Ainçois fussent rebouté comme chien                           16d
                   D’entour telz gens. Or court ceste chançon.
                   Car chascun dit : « Monseigneur dit trop bien. »

                   L’envoy

25               Prince[1], avanciéz est cil qui flate ou ment,
                   Mais qui voir dit, on ne l’aime de rien.
                   Pour ce voit on [tous maux] communement :
                   Car chascun dit : « Monseigneur dit trop bien. »

[1] Ms. Princes