Balade 68 : Esjouis toy, Jerusalem dolente (LXVIII)

Balade

                   Esjouis toy, Jerusalem dolente,
                   Qui tant as eu de tribulacion,
                   Et comme buefs a esté mise en vente,
                   En servitude et persecucion.
5                 Dieux a oy ta lamentacion.
                   A ce coup ci[1] yert le jou desnoé,
                   De la misere aux filles de Syon,
                   Tant que chascuns devra crier Noé.

                   Car je voy ja de charité la sente,
10               Et de pitié la douce mocion,
                   Amour qui vient et un filz represente
                   Pour ton salut et ta redempcion,
                   Qui t’ostera de la subjection
                   Ou cinquante ans a ton peuple noé,
15                Et lors seras en consolacion
                   Tant que chascuns devra crier Noé.

                   France, tu es Jherusalem : ce sente
                   (Or puet sentir) estrange nascion,
                   Qui tant a eu de paine et de tourmente,                         16c
20               Par la gent Bruth[2]. Mais, a m’entencion,
                   Par cest enfant prandront finicion :
                   Car seigneur doit du secle estre advoé
                   [Tres]tout soubmettre et en conclusion,
                   Tant que chascuns devra crier Noé.

                   L’envoy

25               Prince, pour Dieu, le peuple se demente
                   De paix avoir, qui tant vous a loé,
                   Craint et chieri. Faictes que guerre absente,
                   Tant que chascuns devra crier Noé.

[1] Ms. ici

[2] Ms. par le Bruth