Balade 67 : Trente deux ans ara le cerf volant (LXVII)

Balade

                   Trente deux ans ara le cerf volant
                   Des [grans] forets de Gaule et de Bourbon,
                   Au chief legier, et au corps remuant.
                   A .xiii. cors fera craindre son nom,
5                 Et a vint cors sera de tel renom
                   Qu’il destruira, ce dist la lettre escripte,
                   L’isle aux geans[1] et l’asne, vueille ou nom :
                   Tele est de lui la prophecie ditte.

                   Onques n’yssit de son lieu nul plus grant
10               Que cilz sera qui l’asne au pié de plom
                   Et son bestail yra tout destruisant,
                   L’isle au formis, entour et environ,
                   Les corbeaulx gris, leur generacion,
                   Mettra a fin, tout ce qui leur profite,
15                Mort y aura et grant destruction :                                  16b
                   Tele est de lui la prophecie ditte.

                   Aprés yra, ses grans saulx poursaillant,
                   En Orient sur les pors de Mahom.
                   Cel ort bestail yra tout subjugant
20               Et le mettra en sa subjection.
                   .xxviii.[2] cors ara lors le faon
                   Qui rendre doit la saincte terre quitte,
                   Et acroistre sur touz sa region :
                   Telle est de lui la prophecie ditte.

                   L’envoy

25               Ori, occi, midi, semptentrion,
                   Princes, seront en[3] cerf par sa merite.
                   L’aigle ara d’or, ains sa finicion.
                   Tele est de lui la prophecie ditte.

[1] Ms. grans

[2] Saint Hilaire corrige en .xx. et.viii.

[3] Saint Hilaire corrige en au