Balade 66 : Se Voulentéz se tient en son estat (LXVI)

Balade

                   Se Voulentéz se tient en son estat
                   Et Fortune ne lui est trop contraire,
                   Et Bons Advis sa querelle debat,
                   Amours aussi qui seult les cuers attraire,
5                 Et chascuns veult, comme il doit, devoir faire.
                   Le grans contemps des deux Rois finera.
                   Par guerre ou paix le convient [a fin] traire :
                   Car autrement faire ne se pourra.

                   A ce coup fault que l’un des deux soit mat,
10               Car le passant[1] ne se pourroit retraire
                   A son honeur. Se l’autre ne combat,                               16a
                   Il pert du tout son pais, son[2] affaire
                   Par un seul trait, se l’un d’eulx veult mestraire.
                   Au mieulx traiant la terre demourra
15                Et a cellui qui a Dieu vouldra plaire,
                   Car autrement faire ne se pourra.

                   Mais j’ay espoir que cellui qui s’embat
                   Sur l’ennemi qui a voulu deffaire
                   Tout bon traictié y fera tel esclat
20               Que pour les mors faurra grant luminaire.
                   L’offrant raison a titre debonnaire,
                   Le refusant par orgueil perira.
                   Par le champ fault que la chose s’esclaire,
                   Car autrement faire ne se pourra.

                   L’envoy

25               Princes, vueilliéz envers Dieu satisfaire,
                   Vos gens aussi, et Dieu vous aidera.
                   Victoire aréz se le pouéz complaire,
                   Car autrement faire ne se pourra.

[1] Saint Hilaire corrige en puissant

[2] Ms. et son