Balade 72 : Et dont viens tu ? Di moy de tes nouvelles (LXXII)
Autre Balade
Et dont viens tu ? Di moy de tes nouvelles :
Qu’as tu tant fait a la court, a Paris ?
― Que g’i ay fait ? G’i vi[1] maintes querelles
De pluseurs gens qui ne sont pas amis
5 Plaidier entr’eulx. Mais s’acort n’y est mis,
Veu que Justice y va selon Raison,
Sanz entrer enz ilz perdent leur saison.
Dont grant meschief venrra en mainte ville.
Mais on attent Dissimulacion
10 Qui leur fera droit comme une faucille.
L’un a l’autre font tant de chieres belles,
Mais par derrier sont mortelz ennemis.
A celle court l’un prant sur les gabelles,
Et l’autre tent ses compains soit desmis
15 De son estat, sanz ce qu’il soit ois.
L’autre requiert la confiscacion
D’un innocent sanz condempnacion,
L’un .iiic. francs, l’autre en demande mille.
Mais tuit aront, en la conclusion,
20 Qui [leur] fera droit comme une faucille.
On y desrompt aux sergens leurs cotelles,
Et s’y[2] en a qui ont esté occis
Pour exploicter, gettéz jus de leurs selles.
― Et que fait Droit ? ― En mil[le] nulz pugnis.
25 ― C’est bien romflé, le fait leur est remis.
Mais li navré pleurent en leur maison.
― Fait on ainsi ? ― Certes, ainsi fait on :
Qui a de quoy bien treuve qui l’estrille. 17c
Mais brief venrra la grant pugnicion
30 Qui leur fera droit comme une faucille.
L’envoy
Compains, j’entends ta recitation,
Mais se tu dis aussi voir qu’euvangille,
Maint trouveront selon m’entencion
Qui leur fera droit comme une faucille.
[1] Ms. ai veu
[2] Ms. si y
