Balade 62 : Vous qui estes paréz comme espousee (LXII)

Autre Balade

                   Vous qui estes paréz comme espousee,                         15a
                   Qui des granz faiz si bien parler sçavéz,
                   Et qui sur tous avéz la renommee
                   D’estre jolis, qui chantéz et dancéz,
5                 Et qui les faiz des grans choses penséz,
                   Quant en France est chascun, en son pais,
                   Vez ci l’honeur, se querre la vouléz :
                   Vous n’estes pas sur Grant Pont a Paris.

                   Veoir pouéz du Roy Charles l’armee
10               Montee en mer. Sur ce vous adviséz.
                   Servéz le bien de cuer et de pensee,
                   Faittes vers lui ce que faire devéz.
                   Aiéz bon vuer quant vous arriveréz,
                   Et que chasuns soit vaillans et hardis,
15                Si qu’en la fin n’en soit nul diffaméz :
                   Vous n’estes pas sur Grant Pont a Paris.

                   Vous vous boutéz en l’anglesche contree
                   Pour conquerir ce que perdu avéz.
                   ― Qu’est ce ? ― Renom, dont vo terre honouree
20               Fut par long temps. Donques vous recouvréz,
                   Et s’en bataille ou assault vous trouvéz,
                   Monstréz voz cuers plus que voz granz habis.
                   Ou autrement seriéz deshonouréz :
                   Vous n’estes pas sur Grant Pont a Paris.

                   L’envoy

25               Princes, tous ceuls qui sont les mieulz paréz
                   Quant a l’honeur soient les premiers mis.
                   Aviséz bien que fort vous combatéz :
                   Vous n’estes pas sur Grant pont a Paris.