Balade 61 : Sur tous les lieux plaisans et agreables (LXI)

Autre Balade

                   Sur tous les lieux plaisans et agreables
                   Que l’en pourroit en ce monde trouver,
                   Edifiéz de manoirs convenables,
                   Gais et jolis, pour vivre et demourer
5                 Joieusement, puis dant tous prouver
                   Que c’est a la fin du bois
                   De Vincennes, que fist faire li Roys
                   Charles (que Dieux doint paix, joie et santé !)
                   Son filz ainsné, daulphin de Viennois,
10               Donna le nom a ce lieu de Beauté.

                   Et c’est bien drois, car moult est delectables.
                   L’en y oit bien le rossignol chanter.
                   Marne l’ensaint, les haulz bois profitables
                   Du noble parc puet l’en veoir branler,
15                Courre les dains et les connins aler
                   En pasture mainte fois,
                   Des oiseléz oir les douces voix,
                   En la saison et ou printemps d’esté,
                   Ou gentil may, qui est si noble mois :
20               Donna le nom a ce lieu de Beauté.

                   Les prez sont pres, les jardins deduisables,
                   Les beaus preaulx, fontenis bel et cler,
                   Vignes aussi et les terres arables,
                   Moulins tournans, beaus plains a regarder,
25               Et beaus sauvoirs pour les poissons garder.
                   Galatas grans et adrois,
                   Et belle tour qui garde les destrois,
                   Ou l’en se puet retraire a sauveté.
                   Pour tous ces poins, li doulz princes courtois
30               Donna le nom a ce lieu de Beauté.