Balade 60 : Nulz au jour d’ui ne puet regle tenir (LX)

Balade

                   Nulz au jour d’ui ne puet regle tenir,
                   Ne eureté trouver en son estat,
                   Quoi ne comment il se puist maintenir,
                   Soit prince ou roy, chevalier ou prelat,
5                 Bourgois, marchant, laboureur n’advocat :
                   Car d’or a ja changent oppinion.
                   Guerre nous sourt, avarice nous bat :
                   C’est tout noient en la conclusion.

                   A nul ne veult de l’autre souvenir,
10               Le pere au filz pour neant se debat,
                   Serf au seigneur, n’a sires soustenir
                   Ne veult sont droit. Ne nulz ne se combat
                   Pour son pais, mais, comme chien et chat,
                   Sont li parent a leur destruction.
15                Peuple orgueilleus et li subgiet ingrat,
                   C’est tout noient en la conclusion.

                   Chascuns ne fait fors aler et venir
                   Et conseillier sanz achever debat.
                   Les contremans font maint homme homnir
20               Des mandemens, dont li pluseurs sont mat
                   D’eulx endebter. Tout se porte de plat,
                   Au derrenier vendra finicion.
                   Riens n’est certain, pour ce a dire m’esbat :                  14d
                   C’est tout noient en la conclusion.