Balade 59 : Soit en amours, soit en chevalerie (LIX)

Autre Balade

                   Soit en amours, soit en chevalerie,
                   Soit es mestiers communs de labourer,
                   Soit es estas grans, moiens, quoy c’om die,
                   Soit es petis, soit en terre ou en mer,
5                 Soit pres, soit loing tant come on puet aler,
                   Se puet chascun net maintenir qui veult,
                   Ne pour nul grief ne doit a mal tourner :
                   Fay ce que doiz, et aviengne que puet.

                   Car qui povre est et vuiz de villenie
10               Devant tous puet bien sa teste lever.
                   Se loiaulx est, l’en doit prisier sa vie,
                   Quant nul ne scet en lui mal reprouver.
                   Mais cilz qui veult trahir ou desrober
                   Mauvaisement, ou qui autrui bien veult[1],
15                Pert tout bon nom : l’en se seult diffamer :
                   Fay ce que doiz et adviengne que puet.

                   N’aies orgueil, ne d’autrui bien envie,
                   Vueilles toudis aux vertus regarder :
                   T’ame aura bien, le renom ta lignie :                               14c
20               L’un demourra, l’autre est pour toy sauver.
                   Dieux pugnist mal. Le bien remunerer
                   Vourra aux bons ― ainsi faire le suelt.
                   Ne vueilliéz rien contre honeur convoiter :
                   Fay ce que doiz et aviengne que puet.

                   L’envoy

25               Beaus filz, chascuns se doit loiaulx porter
                   Puis qu’il a sens. Estre prodoms l’estuet,
                   Et surtout doit Dieu et honte doubter :
                   Fay ce que dois, et aviengne que puet.

[1] Ms. deult