Balade 56 : Puisque je voy que servir longuement (LVI)

Balade

                   Puisque je voy que servir longuement
                   Et faire bien n’ont point de congnoissance,
                   Que promesse mue soudainement
                   Et que raison a petit de puissance,
5                 Et que Vouloir fait nouvelle ordonnance,
                   Sanz regarder qui a fait mal ou bien
                   Que li bons pert et li chetis s’avance,
                   Je ne vueil plus fors que vivre du mien.                          13d

                   Car j’en sçay moult qui ententivement
10               Et par long temps ont gasté leur chevance,
                   Et, pour servir autrui tresloyaument,
                   Usé leur corps, et en droicte esperance
                   D’avoir guerdon[1]. Mais c’est fole cuidance,
                   Qu’a telz servens [ja] ne donrra l’en rien
15                Ains leur toult on. Quant je voy tele dance,
                   Je ne vueil plus fors que vivre du mien.

                   Et j’ay bien droit, quant je voy clarement
                   Que foul plaisir doulz et foles commence,
                   Et leur donne en[2] les biens communement
20               De ceuls qui ont despendu leur enfance
                   A bien servir. Et tele experience
                   Monstre a chascun qu’il doit garder le sien
                   Et servir Dieu. Pour ceste consequence,
                   Je ne vueil plus fors que vivre du mien.

                   L’envoy

25               Princes, j’ay veu a mainte court en France
                   Maint serviteur servir par ce moien.
                   Et quant g’i voy si doubteuse balance,
                   Je ne vueil plus fors que vivre du mien.

[1] Ms. guerredon

[2] Ms. l’en