Balade 55 : En dimenche, le tiers jour de decembre (LV)
Autre Balade
En dimenche, le tiers jour de decembre,
L’an mil .ccc. avec soixante et huit,
Fut a Saint Pol nez dedenz une chambre
Charles li Roys, .iii. heures puis minuit,
5 Filz de Charles, cinquiesme de ce nom.
Roy des François, de Jehanne de Bourbon,
Roine a ce temps couronnee de France,
Le premier jour de l’Advent qui fut bon.
Par ce sçara chascun ceste naissance.
10 Ou signe estoit, si comme je me membre, 13c
De la Vierge la lune en celle nuit,
En la face seconde. Et si remembre
Qu’au sixte jour dudit mois fut conduit
Et baptizié a Saint Pol, ce scet on,
15 Ou il avoit maint prince et maint baron.
Montmorancy, Dampmartin sans doubtance.
Tous deux Charles leverent l’enfançon :
Par ce sçara chascun ceste naissance.
Trois ans aprés quant li mois de mars entre
20 A treize[1] jour, sabmedi, saichent tuit,
L’an mil .ccc. .lx. et onze, entendre
Puet un chascun la naissance et le bruit
De Loys né, frere du Roy Charlon,
Aprés mie nuit trois[2] heures environ.
25 La lune estoit a .ix. jours de croissance.
Marraine fu madame d’Alençon :
Par ce sçara chascun ceste naissance.
L’envoy
Princes, parrains fut Bertran, li prodom
Connestables, qui tant ot de renom,
30 De vostre fere. Aiéz en souvenance :
A Saint Poul fut nez en vostre maison,
Et baptisiéz fut par Jehan de Craon :
Par ce sçara chascun ceste naissance.
[1] Ms. tiers
[2] Ms. lieues
