Balade 53 : De tous les .vii. ars qui sont liberaulx (LIII)

Autre Balade

                   De tous les .vii. ars qui sont liberaulx,
                   Lequel est plus au jour d’ui en usaige ?
                   Cellui de tous qui mendre est entr’aulx,
                   Et qui moins tient de vertu et de saige :
5                 C’est de compter et tenir[1] or en caige,
                   De convoitier et faire[2] demonstrance
                   D’argent trouver. Est ce beau vassellaige ?
                   Nulz n’a estat que sur fait de finance.

                   Uns receveur, un changeur s’il est caux,
10               Un monnoier, ceuls sont en haulte caige,
                   Et les claime on seigneurs et generaulx,
                   Et c’est bien droiz : grant est leur heritaige.
                   L’or et l’argent passent par leur passaige,
                   Villes chasteaulx ferment par leur puissance.
15                Aux clers lettréz vault petit leur langaige :
                   Nul n’a estat que sur fait de finance.

                   Petit puelent aux autres : c’est deffaulx
                   D’entendement, de congnoissance saige[3]
                   Qui ne congnoist des vaillans les travaulx,
20               Ne des expers le sens et le couraige :
                   Convoitise gouverne, qui enrraige
                   D’argent tirer, qui les bons desavance,
                   Et fait a tous sçavoir par son messaige :
                   Nulz n’a estat que sur fait de finance.

                   L’envoy

25               Prince, pou vault estre homme de parage[4],
                   Saiges, prodoms, n’avoir grant diligence.
                   Pour le jour d’ui vault trop pou vassellaige :
                   Nulz n’a estat que sur fait de finance.

[1] Ms. de tenir

[2] Ms. et de faire

[3] Ms. nage

[4] Saint Hilaire corrige en paraige