Balade 52 : Helas ! est il homme qui me sceust (LII)

Autre Balade

                   Helas ! est il homme qui me sceust
                   Dire le temps que cilz mondes faurra ?
                   ― Pour quel raison ? ― Pour ce que trop pleust
                   A moult de gens. ― Seufre, li temps venrra.
5                 Les signes voy que li cours muera
                   De ce monde qui approuche sa fin,
                   Qui longuement en ce point ne durra :
                   Metheode tesmoing et Joachin.

                   Les signes sont, qui a droit les leust,
10               Orgueil trop grant, dont Romme s’esleva,
                   Et convoitier trop plus que ne deust :
                   Le bien commun a faire delaissa.
                   Et aussi tost que chascuns convoita
                   Particulier, Romme ala a declin.
15                Et par telz cas ce monde s’en ira,
                   Metheode tesmoing et Joachin.

                   Adjoint encore que la loy despleust,
                   Si cille on voit, de Dieu qui tout crea,
                   Que Justice effect ne port eust
20               Ne pitié, lieu. Quant Pouoir regnera
                   Generaument, et qu’om convoitera
                   Le maisonnier, joyaulx, argent, or fin,                             13a
                   Le monde viel convoiteux finera :
                   Metheode tesmoing et Joachin