Balade 51 : Bon fait garder sens, droiture et raison (LI)

Balade

                   Bon fait garder sens, droiture et raison,
                   Et estre en tout de bon gouvernement,
                   Soi[1] pourveoir de loing et en saison,
                   Regle tenir, et espargnablement
5                 Vivre du sien non[2] foleablement.
                   Homs vault petit, s’en lui n’a retenue
                   Pour un besoing. Euvre donc saigement :
                   Ne fay passer despens ta revenue.

                   Car qui le fait, il destruit sa maison.
10               [Et] je te puis trop bien monstrer comment :
                   Qui cent frans a de rente ou de moison,
                   Et les despent en un an seulement,
                   Se cas soudain lui vient soudainement,
                   Engaigier fault sa terre de venue :                                  12d
15                Ainsi pert homs[3] demaine et tenement :
                   Ne fay passer despens ta revenue.

                   Qui moins despent, il espargne foison.
                   Au cas soudain pourvoit la clerement,
                   Sanz emprunter, et sauve le gason,
20               Et tient seur son fait moiennement.
                   Chascun veillier doit pour son sauvement,
                   S’avoir ne veult default et maison nue[4].
                   Advise ci, pour ton enseignement,
                   Ne fay passer despens ta revenue.

[1] Ms. soit

[2] Ms. et non

[3] Ms. Homme

[4] Ms. mue