Balade 50 : L’en doit mettre gens aprins es offices (L)

Autre Balade

                   L’en doit mettre gens aprins es offices,
                   En chascun art qui saichent gouverner,
                   Bons et loiaulx, non aprantis et nices,
                   Car puellent trop a aprandre couster
5                 Au souverain, ses estas rebouter.
                   Et qui aient par longue experience
                   Esté veuz leur fait bien ordonner :
                   Qui ainsi fait, il prant bonne ordonnance.

                   Un pou en ait a leurs estas propices
10               Et diligens. A ceuls doit l’en donner
                   Gaiges par an selon leurs benefices.                               12c
                   Soient contens d’iceulx, sanz demander
                   Dons au seigneur. Ne les vueille muer
                   De leurs estas, s’il n’y a congnoissance
15                De leur meffait, et les oye parler.
                   Qui ainsi fait, il prant bonne ordenance.

                   Lors a hostel sanz pechiéz et sanz vices.
                   Sa maison fait partout bien renommer.
                   Or fay ainsi, par quoy tu ne perices,
20               Et chascun jour venrras [tout] admender.
                   Regle tenir et la non exceder
                   Fait de tous biens avoir perseverance.
                   Le rebours non. Chascuns doit esperer.
                   Qui ainsi fait, il prant bonne ordenance.

                   L’envoy

25               Princes, l’en doit vaillans saiges amer,
                   Et serviteurs loyaulx a la balance
                   Querre et avoir, pour les estas garder :
                   Qui ainsi fait, il prant bonne ordonnance.