Balade 47 : Presumpcion est ou grant convoitise (XLVII)

Balade

                   Presumpcion est ou grant convoitise,
                   Ou po de sens a homme, de vouloir
                   Tout gouverner, ne faire s’entreprinse
                   Sur autrui fais. Car chascuns doit sçavoir
5                 Que cilz qui scet bien faire son devoir
                   En un estat, quant il lui est commis,                               11d
                   Est reputéz en ce plains de sçavoir :
                   Trop convoitier fait asséz d’ennemis.

                   En chascun art souffist une maistrise,
10               Et un seigneur en une ville avoir,
                   Aussi fait il, a la court, d’un servise :
                   Chascuns frans [homs] doit faire son pouoir
                   De bien servir, n’autres[1] ne doit mouvoir
                   Qui service a, n’enprandre[2], ce m’est vis,
15                Sur autre estat. Maint s’en puellent doloir :
                   Trop convoitier fait asséz d’ennemis.

                   Cilz a po sens qui se cuide et se prise
                   Et qui veult grans sur les autres paroir,
                   Louans ses faiz et les autres desprise.
20               Ainsis le[3] fait convoiteux apparoir
                   Et orgueilleus, et hair, c’est tout voir :
                   Et au derrain est hors de grace mis,
                   En estat seur ne puet longues manoir :
                   Trop convoitier fait asséz d’ennemis.

                   L’envoy

25               Princes, foulz est qui fait tele entreprinse.
                   Face chascuns l’estat ou il est mis,
                   Sanz convoitier l’autre pour avoir mise :
                   Trop convoitier fait asséz d’ennemis.

[1] Saint Hilaire corrige en autre

[2] Ms. entreprandre

[3] Saint Hilaire corrige en se