Balade 42 : Chetis, que fais ? Va demander au Roy (XLII)

Balade

                   Chetis, que fais ? Va demander au Roy
                   Car il ne scet nul homme refuser.
                   ― J’ai plus que li, ou autant. ― Or dy quoi.
                   ― Tresvoulentiers, vueilles y regarder :
5                 J’ay terre asséz pour moy [bien] gouverner,
                   Bien sui vestus, et s’ay bonne maison,
                   Et un cheval pour mon travail porter :
                   A homme plus ne fault, selon raison.

                   De tous les biens n’a plus nulz homs de moy
10               Qui le puissent long temps faire durer.
                   Avise bien a ces choses et voy,
                   Et tu verras de certain et tout cler
                   Que Roy ne duc, pour chevance amasser,
                   N’ont que ces trois[1]et ne toute saison :
15                Manger, vestir, cheval et hosteller :
                   A homme plus ne fault, selon raison                          10d

                   Car le surplus excede oultre la loy
                   De nature, qui se doit contenter,
                   Quant elle n’a froidure, faim ne soy,
20               Ne grant travail de lieu a autre aler.
                   Qui ces .iiii. a, il doit Dieu moult louer,
                   Et qu’a nullui ne face desraison.
                   Souffise lui. Qui veult vivre et regner,
                   A homme plus ne fault, selon raison.

                   L’envoy

25               Princes, qui a ces .iiii. poins pour soy,
                   Et que faillir n’y puist, m’entencion
                   Est qu’il est bien. et pour ce, en bonne foy,
                   A homme plus n fault, selon raison.

[1] Saint Hilaire corrige en quatre.