Balade 43 : Dolentement, en doleur desperee (XLIII)

Autre Balade

                   Dolentement, en doleur desperee[1],
                   Triste de cuer, sanz joie et sanz soulas,
                   Voy un chascun, ne creature nee
                   Au temps qui est ne voy fors dire : helas !
5                 Guerre et tourment, riotes et debas,
                   Prandre et ravir, ce c’om ne suelt pas faire.
                   Convoitise a partout tendu ses las :
                   Lequel vault mieulx : ou parler, ou soy taire ?

                   Par trop parler est haine engendree,
10               Et en pert on du sien en pluseurs cas.
                   Le dire voir a maintes gens n’agree
                   Et qui le dit, il convient parler bas.
                   Qui trop se taist, on le lui donne pas,
                   Mais lui toult l’en. Lors fault crier et braire.
15                Muiaux n’ont rien. Sachiéz aux advocas
                   Lequel vault mieux : ou parler, ou soy taire ?

                   Soit sur ces deux vo sentence donnee.
                   ― Tresvoulentiers : parler fault a compas,
                   Ne trop ne pou, par maniere ordonnee.
20               Ou il fait dur, qu’on eschive le pas,                                 11a
                   Qu’om soit muyau, tant c’om ne die : las !
                   Par trop parler, aussi par le contraire.
                   Quant temps sera, lors parole […][2]
                   Lequel vault mieulx : ou parler, ou soy taire ?

[1] Ms. desesperee

[2] Fin de vers manquant dans le manuscrit. Saint Hilaire suggère de suppléer diras.