Balade 41 : Entre les choses de jeunesse (XLI)

Balade

                   Entre les choses de jeunesse
                   Que l’en m’aprinst dans mon enfance,
                   Mon maistre me blama yvresse
                   Et a trop emplire ma pence.
5                 De trop parler me fist deffense,
                   Et a mouvoir de chaude cole,
                   Et me dist par belle sentence :
                   Tien toudis vraie ta parole.

                   Garde a qui tu feras promesse,
10                La cause pour quoy. Et t’avance
                   De l’acomplir : cuer de noblesse
                   Doit acomplir sa convenance.                                      10c
                   Qui ne le fait, il desavance
                   Son honeur. Le saige parole
15                Et dit que mentir est offense.
                   Tien toudis vraie ta parole.

                   Convent tenir est la hautesse
                   De cuer de homme de vaillance.
                   Se va rendre en une forteresse
20               Prinsonnier, et n’a esperance
                   D’en retourner, et est pour ce
                   Qu’il le promist. Foulz est et fole
                   Qui conchie sa conscience :
                   Tien toudis vraie ta parole.

                   L’envoy

25               Beau filz, mieulx vault faire silence
                   Que promettre. Li homs s’afole
                   De mentir par acoustumance :
                   Tien toudis vraie ta parole.