Balade 40 : Dieux ordonna la franche voulenté (XL)

Autre Balade

                   Dieux ordonna la franche voulenté
                   A un chascun, pour faire mal ou bien,
                   Merite au bien, au mal paine et durté :
                   Et, quant a moy, ceste sentence tien.
5                 Car les mauvais du temps tresancien
                   Ont mal finé et eu pignicion,
                   Et les bons ont eu merite au derrien :
                   Nostre foy tient ceste conclusion.                               10b

                   Les cours du ciel ou ilz sont ahurté
10               Leur sont souvent de mal faire moien,
                   Aux autres, bien, douçour et charité.
                   Mais quant au fort, selon[1] vouloir, n’est rien,
                   Necessité ne leur met nul loien,
                   N’en ce cas n’a lieu d’estimacion,
15               Il s’ensuiroit Dieu non juste en maintien :
                   Nostre foy tient ceste conclusion.

                   Mais Dieu rendra raison et equité
                   A bien faisant. Au mauvais Julien
                   Ne rendit il d’ame et de corps griefté ?
20               Mourir le fist enrragié comme un chien.
                   S’autrement fust, je voy et sçay trop bien,
                   Chascuns usast de constellacion.
                   Autrement va, chascun ara le sien :
                   Nostre foy tient ceste conclusion.

                   L’envoy

25               Princes, les faulx aront maleureté,
                   Et les loyaulx remuneracion.
                   Les mauvais, mal, les bons, toute bonté :
                   Nostre foy tient ceste conclusion.

[1] Saint Hilaire corrige en se lor