Balade 39 : J’ay veu pluseurs de nobles gens venter (XXXIX)
Balade
J’ay veu pluseurs de nobles gens venter
De faire faiz de grant chevalerie.
D’armes aussi, des premiers assembler
Aux ennemis de s’adverse partie.
5 De plus faire qu’oms de la compaignie,
Qui me semble grant chose a acomplir,
Quant chascun a de bien faire desir
Et que pluseurs ont ceste voulenté,
Et qu’en Dieux est de touz la poesté.
10 Mais quant a moy je voue a bonne amour
Que si je puis revenir en santé, 10a
Qu’a ma Dame donrray chapeau de flour
Et si feray un grant cierge alumer
Com pelerin a la vierge Marie,
15 Droit a Paris, aprés mon retourner,
En son monstier ou l’en aoure et prie.
Se Dieux et li vueillent sauver ma vie,
Et que je puisse a honeur revenir
Avec le Roy, c’est ce que je desir,
20 De la duchié de Guerle, ains cest esté,
Et eschiver d’iver la povreté,
Le guait de nuit et la dure froidour,
Je veue a Dieu, si je suis retourné,
Qu’a ma Dame donrray chapiau de flour.
25 Et droyt a lui m’iray recommander
En suppliant que mon las cuer n’oublie,
Qui loing de lui me fai[t] trop endurer.
Quant j’oy crier alarme la nuitie,
Logier a plain, au froit et sanz fueillie.
30 Adonc me vient d’elle le souvenir,
Et je ne puis mes ganteléz tenir
S’en mes mains n’ay .ii. ou trois fois souflé.
Se pluie vient, je suis desconforté.
Mais a Dieu veu, se je viens au retour,
35 Quant je seray en no marche arrivé,
Qu’a ma Dame donrray chapeau de flour.
