Balade 38 : Cilz qui a longuement servi (XXXVIII)

Autre Balade 9d

                   Cilz qui a longuement servi
                   Son seigneur, et son temps usé,
                   Doit de droit estre remeri,
                   Et de son temps guerredonné :
5                 Mais je ne sçay qui a trouvé
                   Un mot qui trop desplaire seult
                   A tous cuers plains de loyauté,
                   C’est que il se sauve qui puet !

                   Onques mais plus grief mot n’oy :
10                D’en servir suis destalenté.
                   S’uns homs n’a rien prins ne ravi,
                   Et il s’est loyaument porté
                   Vers son seigneur, et supporté
                   Ses travaulx, adoncques se duelt,
15                Quant on lui respont par durté,
                   C’est que il se sauve qui puet !

                   Pour ce conseille a ceuls et di
                   Qui ont sens, jonesce et santé,
                   S’ilz servent, qu’ilz sachent a qui.
20               […][1]
                   Et quant il a tout amassé
                   Pour l’estat ou raison le muet,
                   Du mot vient [il] reconforté :
                   C’est que il se sauve qui puet.

[1] Vers manquant