Balade 36 : J’ay leu et veu une moralité (XXXVI)

Autre Balade

                   J’ay leu et veu une moralité
                   Ou chascuns puet asséz avoir advis,
                   C’uns paisans qui, par necessité
                   Cavoit terre, trouva un serpent bis
5                 Ainsis que mort, et adonques l’a pris
                   Et l’apporta, en son celier l’estant.
                   La fut de lui peus, chaufez, nourris.
                   Mais[1] on rent mal en lieu de bien souvent.

                   Car li serpens plains de desloyauté,
10                Roussiaulx et fel, quant il se voit garis,
                   Au paisant a son venin getté.
                   Par lui li fut mal pour bien remeris.
                   Par bien faire est li povres homs peris
                   Qui par pitié ot nourri le serpent.
15                Moult de gens sont, pour bien faire, honnnis,
                   Mais on rent mal en lieu de bien souvent.                   9c

                   C’est grant doleur quant l’en fait amisté
                   A tel qui puis en devient ennemis.
                   Ingratitude est ce vice appellé,
20               Dont pluseurs gens sont au monde entrepris,
                   Retribuens le mal a leur amis
                   Qui leur ont fait le bien communement.
                   Ainsis fait on, s’en perdront paradis.
                   Mais on rent mal en lieu de bien souvent.

[1] Ms. mal