Balade 35 : Quant roy Ceis ala au dieu de Claire (XXXV)

Autre Balade

                   Quant roy Ceis[1] ala au dieu de Clare[2]
                   Et se bouta es perilz de la mer,
                   Pour enquerir aux sors tout son affaire,
                   Alchione l’en voult souvent blamer
5                 Pour les perilz, soy chetive clamer.
                   Sa femme fut, d’Eolus fille estoit
                   Le dieu des vens, qui moult fait a doubter :
                   Foulz est li homs qui bon conseil ne croit.

                   Car Ceys ot grant fortune et contraire,
10               Qui son vaissel et ses gens fist verser
                   Et tout perir, combien que luminaire
                   Fist Alchione a Juno, sans cesser
                   De jour en jour, qu’il peust respasser
                   A sauveté. La dieuesse sçavoit                                      9b
15                Qu’il yert ja mors. Pour ce voult demonstrer
                   Foulz est li homs qui bon conseil ne croit.

                   Au dieu dormant tramist Yrum[3] pour faire
                   En lieu du Roy Morpheus transmuer
                   Vers Alchyone, et monstrer exemplaire.
20               Et il si fist : par son transfigure[r]
                   Certaine en fu. ― Toi suppli commander
                   Que ma Dame Morpheus briefment voit
                   Monstrer mes maulx, car je sçay tout de cler,
                   Foulz est li homs qui bon conseil ne croit.

                   Envoi

25               Saincte Juno, vueilléz moy conforter,
                   Car je n’ose n’escripre ne parler
                   A ma Dame : quelque part qu’elle soit,
                   Fay lui mes maulx en dormant figurer
                   Par Morpheus. De conseil vueil ouvrer :
30               Foulz est [li homs] qui bon conseil ne croit.

[1] Ms. Cirus

[2] Saint Hilaire corrige en Claire, jugeant la rime incomplète avec la forme Clare

[3] Saint Hilaire corrige en Yrim.