Balade 34 : Moult sont belles les euvres de nature (XXXIV)

Autre Balade

                   Moult sont belles les euvres de nature,
                   Laides aussi quant au desnaturer.
                   Une jument n’aroit d’un toreaux cure,
                   Ne la chievre n’a cure du sangler.
5                 Chascun se doit a son per assembler,                           9a
                   Pour [bien] vivre non dissemblablement.
                   Homme et femme voy en ce trop errer :
                   Foulz est vieulx homs qui jeune femme prant.

                   Car il est frois et n’a de soulas cure,
10                Et ne het riens tant com veoir jouer,
                   Et le deduit quiert jeune creature.
                   Disassemblés[1] sont en leur marier.
                   Si les voit on l’un l’autre jurier
                   Souventefoiz se font injure grant[2].
15                En tel estat se fait mauvais bouter :
                   Foulz est vieulz homs qui jeusne femme prant.

                   Contraires sont leurs meurs, en l’escripture
                   A grant paine se puellent confermer.
                   Pour c’est cilz foulz, s’elle[3] se desnature,
20               Qui jeune a viel se veulent adrecier.
                   C’est ce qui fait mariage blamer.
                   Les vieulx aux vieulx, jeunes aux jeunes gens,
                   Ainsi pourront bonne vie mener :
                   Foulz est vieulz homs qui jeune femme prant.

[1] Ms. Dissemblés

[2] Ms. se font mainte injure

[3] Saint Hilaire corrige en celle