Balade 33 : Pluseurs veulent parler d’amours (XXXIII)
Autre Balade
Pluseurs veulent parler d’amours
Et chascuns dit qu’il veult amer
Mais maint homme voy qui a mours,
Plus doubteus que n’est flos de mer.
5 Car doulz parlent, puis vient l’amer.
A ceuls qui[1] veulent decepvoir,
Leur bouche ment, le cuer dit voir.
Ceste amour fausseté se claime, 8d
Qui promet blanc et baille noir :
10 Je ne sçay nul qui a droit aime.
Fors de faire fainctes clamours,
Et soy las dolereus clamer,
Jusqu’il ait essaié ses tours
Et qu’il puist[2] sa proie entamer.
15 Ce qu’il loa veult diffamer,
Et ce qui n’est fait assavoir.
De mençonge veult faire voir.
C’est l’oysel crient sur la raime,
Pie janglant qui n’a pouoir :
20 Je ne sçay nul qui a droit aime.
J’entens d’amans tout le rebours
Au jour d’ui, fors que du parler
Qui semble miel en maintes cours.
Mais on y fait fiel destremper.
25 La voit on Faulx Semblant ramper
De l’un a l’autre. Et percevoir
Le puet on : car chascun avoir
Vouldroit de l’autre et pesche et saime[3].
Dieux, quel amour ! fy du vouloir !
30 Je n’en voy nul qui a droit aime.
L’envoy
Princes, je ne voy que faulx tours,
Et parler de fainctes coulours,
Doulz comme let ou comme craime.
Mais amere en est la savours
35 Et la conclusion piours :
Je ne sçay nul qui a droit aime.
[1] Saint Hilaire corrige en que.
[2] Ms. puisse
[3] Ms. farine
