Balade 32 : Ilz sont cincq sains, en la genealogie (XXXII)

Autre Balade

                   Ilz sont cincq sains, en la genealogie,
                   Et cinq sainctes, a qui Dieux octria
                   Benignement, a la fin de leur vie,
                   Que[1] quiconques de cuer les requerra                          8c
5                 En tous perilz, que Dieux essaucera
                   Leurs prieres, pour quelconque mesaise.
                   Saiges est donc qui ces cinq servira,
                   Jorges, Denis, Christofle, Gille et Blaise.

                   Katerine est des cinq sainctes celie
10                Qui les tyrans et docteurs surmonta.
                   Marguerite, qui le dragon d’envie
                   Par sa chasté vainquit et subjuga.
                   Marthe qui Dieu maintes foiz hostela
                   Et qui destruit la serpente punaise
15                A Terascon. Serve donc qui pourra
                   Jorge, Denis, Christofle, Gille et Blaise.

                   Et Cristine fut de roial lignie
                   Qui les faulx dieux des paiens despita.
                   Barbe l’ensuit, qui telz dieux n’ama mie.
20               Denis aux Frans la creance admena.
                   Jorge fut fort, Christofle Dieu porta,
                   Gilles saicha Charlon de grief fournaise.
                   Blaise fut purs : benois soit qui craindra
                   Jorge, Denis, Christofle, Gille et Blaise.

                   L’envoy

25               Prince, a ces dix que j’ay nommé deça
                   Fait bon servir, offrir chose qui plaise.
                   Pour ce, a tousjours mes cuers servir vouldra
                   Jorge, Denis, Christofle, Gille et Blaise.

[1] Ms. Qui