Balade 29 : Qui me sçaroit bien aprandre a mentir (XXIX)

Autre Balade

                   Qui me sçaroit bien aprandre a mentir
                   Et qu’il semblast que je deisse avoir,
                   Il me feroit mainte gloire sentir,
                   Et honourer. ― Le veulz tu donq[1] sçavoir ?
5                 […][2]
                   Oy les mains d’or et les langues d’argent,
                   Et tu pourras Mentir apercevoir
                   Par les respons que l’en donne a la gent

                   Ou temple Dathan[3] pourras advertir
10                Aux ydoles qui seulent decevoir
                   Par leurs respons doubles, et amorter
                   Les requerans, et verras apparoir
                   Les faulx prestres qui sont de la secte hoir,
                   Gros, gras, fourréz, qui font maint indigent
15                Et maint chetis perdre temps et avoir,
                   Par les respons que l’en donne a la gent.

                   Car l’idole fait le sens pervertir
                   De son respons et ment, c’est son devoir.
                   Car la se fait dons et honeurs offrir,
20               Et poursuir son temple et son pouoir.
                   Et qui[4] ne veult fait semblant de vouloir.                    8a
                   Au jour d’ui sont de ce temple regent
                   Maint d’Abyron[5], qui devendront tuit noir
                   Par les respons que l’en donne a la gent.

                   L’envoy

25               Prince, au jour d’ui voy tout anientir
                   En prestre, en clerc, en noble et en sergent.
                   Taire le voir, regehir[6] le mentir,
                   Par les respons que l’en donne a la gent.

[1] Ms. doncques

[2] Vers manquant.

[3] Ms. Dathas

[4] Saint Hilaire corrige en Ce que

[5] Ms. Dabiran

[6] Ms. et regehir