Balade 28 : Soit tort soit droit est une decretale (XXVIII)

Autre Balade

                   Soit tort soit droit est une decretale
                   Dont li mondes use comme de loy,
                   En jugement, en marchié, en la hale,
                   Ou grant moustier, en l’empire. Et, par foy,
5                 Pluseurs en ont usé a court de Roy.
                   Sur les foibles en usent li plus fort,
                   L’interpreter est aux puissans, ce croy :
                   Chascuns le veult avoir, soit droit soit tort.

                   Ceste loy court et en chambre et en sale,
10                [Et] par les champs, partout courir la voy.
                   Qui a le sien et l’autrui en sa male
                   Plus grant moncel en puet faire par soy.
                   Qui a bien beu, il n’a pas si grant soy
                   Comme cellui qui sue par effort
15                De grant travail. Avise ci un poy :                                 7d
                   Chascuns le veult avoir, soit droit soit tort.

                   Et quant je voy, neis jusqu’a la godale,
                   Ce nombre edit regner et faire effroy,
                   Et en comptant faire somme totale
20               A son plaisir, sanz opposer, j’octroy
                   Que Justice et Equité, cil doy,
                   Voisent dormir. Car aise est qui se dort.
                   En tel triboul est le monde en bon ploy :
                   Chascun le veult avoir, soit droit soit tort.

                   L’envoy

25               Prince, le temps tourne et retournera,
                   Rien violent ne peut durer au fort.
                   Saiges est cilz qui cy s’avisera :
                   Chascuns le veult avoir, soit droit soit tort.