Balade 27 : Je voy l’ortie et le chardon (XXVII)

Balade

                   Je voy l’ortie et le chardon,
                   Le jonc marin et la sicue,
                   La cauppe treppe et le tendon,
                   Et toute herbe qui point et tue,
5                 Ou qui a tout mal s’esvertue,
                   Que chascun veult prandre et avoir,
                   Planter, lever jusqu’a la nue :
                   Bonne herbe est mise en nonchaloir.

                   Je ne voy rose ne bouton,
10                Lavende, violette drue,
                   Marjolaine, basilicon,                                                     7c
                   Balme[1] ne douce odeur en rue.
                   Le bon plan se destruit et mue.
                   Dont le blanc lis devendra noir,
15                Par le faulx plant qui tout remue.
                   Bonne herbe est mise en nonchaloir.

                   Dont le beau jardin de renom
                   Duquel l’odeur fut loing sentue
                   Ne portera plus le fruit bon
20               Dont la gent estoit soustenue :
                   La terre sera povre et nue
                   Et tuit bon fuiront ce manoir.
                   N’est ce pas grant desconvenue ?
                   Bonne herbe est mise en nonchaloir.

                   L’envoy

25               Prince, ostéz a vostre venue
                   Mauvais plant, s’il veut apparoir.
                   Bonne yert lors vo vie tenue.
                   Bonne herbe est mise en nonchaloir.

[1] Ms. baloine