Balade 26 : J’ay tant crié, com le viel Symeon (XXVI)

Autre Balade

                   J’ay tant crié, com le viel Symeon,
                   Et lamenté, comme fist Jeremie,
                   En esperant, que la redempcion
                   De Gaule en grec sur la terre d’Albie
5                 Voy approuchier, et que la prophecie
                   Bede, Merlin et Sebile, ensement
                   Avec le Brut commencent proprement
                   Leur grant effect […][1]                                                      7b
                   Et le liepart perdront leur tenement,
10                Tant qu’om dira : Angleterre fut cy.

                   L’aigle venrra des marches d’Aquilon,
                   O ses poucins, seoir en Nothumbrie.
                   D’un autre les passera le lion
                   O ses cheaulx, plains de forsenerie.
15                Deux lieux prandra qui aront seigneurie
                   Et destruiront le Nort crueusement.
                   Et le pais qui anciennement
                   Fut renomméz d’aventures aussi
                   Se doit tourner a leur destruisement,
20               Tant qu’on dira : Angleterre fut cy.

                   Franc et Escot, li ancien Breton
                   Les filz de Bruth et toute leur lignie
                   En un conflit feront crier leur nom,
                   Et la sera grant bataille establie.
25               Du sang des mors de chascune partie
                   Fleuves courront, et veritablement
                   Les fils de Brut mourront la a tourment,
                   Et, des ce jour, n’ont espoir de merci :
                   Destruiz seront, c’est leur definement,
30               Tant qu’om dira : Angleterre fut cy.

[1] Fin de vers manquant dans le manuscrit.