Balade 30 : Bien viengnéz ! c’est quant vous vouléz (XXX)

Autre Balade

                   Bien viengnéz ! c’est quant vous vouléz
                   Que vous retournéz par deça.
                   Mais a piece congié n’aréz,
                   Vostre demeure vous parra.
5                 Que dictes vous ? est ce cela ?
                   De tel demeure est bonne paix :
                   Puis c’uns homs de court partira,
                   De lui ne souvendra jamais.

                   Et c’est droit, que tant en avéz
10                Qu’adés l’un vient et l’autre va.
                   Les viéz pour nouveaulx oubliéz :
                   Ja plus d’eulx ne vous souvendra.
                   Demourer puet bien qui vouldra,
                   Soit nobles, clercs, bourgois ou lays.
15                Car puis le jour qu’il s’en yra,
                   De lui ne souvendra jamais.

                   ― Se n’est, quant vous le reveéz,
                   (D’aventure qu’il revendra),
                   Adonc bien viengnant lui seréz,
20               Et chascuns le regardera.
                   Estrangement la se verra,
                   Honteux comme uns pors aux abays.
                   Qui ainsi de court s’en vendra,
                   De lui ne souvendra jamais.

                   L’envoy

25               Prince[1], avise cy qui vouldra.                                         8b
                   Il fait bon avoir un relays.
                   Car puis que tous servens fauldra,
                   De lui ne souvendra jamais.

[1] Ms. Princes