Balade 20 : Trop me merveil comme uns homs contrefais (XX)

Balade

                   Trop me merveil comme[1] uns homs contrefais
                   Ose boiteux un autre homme appeler,
                   Ne comment cilz qui se sent bien meffais
                   Ose des maulx d’un estrange parler.
5                 Mieux lui vaulsist ses œuvres regarder,
                   Si se trairoit, sanz plus blamer nullui,
                   Que li mauvais a nul blame eslever :
                   Ceuls s’accusent qui dient mal d’autrui.
                   Car les blamés leur reprouchent leur fais,

10                Pour les crimes mis sur eulx rebouter,
                   Et en oient aucune fois de lais,
                   Autres aussi qui les vont escouter,
                   Que l’en leur seult, puis ce temps, reprouver,
                   Et dont ilz ont par eulx honte et ennuy.                      6a
15                Pour ce, chascuns doit sa bouche garder :
                   Ceuls s’accusent qui dient mal d’autrui.

                   Chascuns devroit penser a ses meffais,
                   Et les autres devroit laissier aler.
                   Mais femme ou homs, mehaingnéz et meffais,
20               Vourroit que touz le peussent ressembler.
                   Pour ce veulent le bon renom embler
                   De ceuls qui sont meilleur d’eulx ou de lui.
                   Or vueillent ceuls mesdisans aviser :
                   Ceuls s’acusent qui dient mal d’autrui.

[1] Ms. comment