Balade 21 : Nulz ne se doit au jour d’ui merveillier (XXI)

Autre Balade

                   Nulz ne se doit au jour d’ui merveillier
                   Ne esbahir de chose que il[1] voie,
                   Se les uns ont par trop pou traveillier,
                   Se les autres n’ont leesse ne joie.
5                 Car li temps est que chascuns se desroie,
                   Et que tout bien est mis en oubliance.
                   Convoitise tout ce monde desvoie
                   Par le deffault de vraie congnoissance.

                   A Foul Plaisir se fait bon conseillier,
10                Car maint chetif en hault estat convoie.
                   Il en a ja fait grans plus d’un millier,
                   Mais des haulx lieux pluseurs sages forvoie.
                   Honour s’enfuit. Il n’est raison qu’on croie,
                   Verité part. Reposte s’est Vaillance.
15                Justice fault, et tout vice s’avoie
                   Par le default de vraie congnoissance.

                   Pour ce ne sçay mais nul homme adrecier
                   Que faire doit, fors tant qu’il se resjoie.
                   Ne li chaille des bossus redrecier,
20               Et se chose voit faire qu’on ne doie,
                   Face semblant qu’il ne le voit ou oie.
                   Sanz li mouvoir, ait bonne pacience,
                   Car ce monde est le gieu Boute en courroie,               6b
                   Par le default de vraie congnoissance.

[1] Ms. qu’il