Balade 19 : J’ay en Flandres trois fois oy sonner (XIX)

Balade

                   J’ay en Flandres trois fois oy sonner,
                   Et de bien loings suis alé a la messe
                   A Rosebech, ou je vi sermonner :
                   Vint mille hommes furent mors en la presse.
5                 Au second coup fut a Bonbourc[1] m’adresse.
                   Le tiers au Dam[2], dont je ne suis pas dignes.
                   S’enquier a tous pour oster ma tristesce,
                   Quant sonnera li retours de matines.

                   Mauvais y fait longuement sejourner                           5d
10                Car le pais les gens et chevaulx blesce,
                   Et quant il pluet, on ne scet ou tourner.
                   Pain, vin ne vient. Seurté n’y a, n’adresce.
                   En fourraige a pou de foing et de vesce.
                   Œufs faillent la, cannes, cogs et gelines.
15                En chevauchant demande, est ce simplesce ?
                   Quant sonnera le retour de matines.

                   Car lors sera le temps de retourner
                   A son hostel. S’ara chascun leesse :
                   Te Deum laudamus [en] hault chanter
20               Oiréz pluseurs, pour oster leur destresse.
                   Varlet n’y a, ne maistre, ne maistresse,
                   Qui en cirant a Dieu, les mains enclines,
                   N’enquiere a tous, pour finer leur apresse,
                   Quant sonnera le retour de matines.

                   L’envoy

25               Prince[3], en Flandres voy longuement chanter :
                   Courte messe aim, beau disner, grant cuisine.
                   Pour ce vous vueil humblement demander,
                   Quant sonnera le retour de matines.

[1] Saint Hilaire corrige en Bourbourc

[2] Ms. Daan

[3] Ms. Princes