Balade 13 : S’Argus qui ot cent oeulx pour regarder (XIII)

Balade

                   S’Argus qui ot cent oeulx pour regarder,
                   Et Lins qui voit sur toute beste mue,
                   Et Alpheus qui ne se pot garder
                   D’Arethusa, qu’il chaça toute nue
5                 Ou fleuve ou elle baingnoit,
                   Tant que tous deux[1] en plours convertissoit
                   Ne cessoient tous de plourer, ainsi
                   A fort plourer la mort ne souffiroit
                   Le bon prodomme et chevalier Sampy.

10                Car saiges fut, a ses faiz regarder.
                   La frontiere a devers Guines tenue
                   Pour son seigneur, saigement, sanz errer.
                   Ne qu’a son temps ait fortresce[2] perdue.
                   Guines, Calays le doubtoit,
15                Car saigement touz ses faiz emprenoit,
                   Et maintefoiz les Anglois desconfy :
                   Gravelingues leur basti en temps froit
                   Le bon prodomme et chevalier Sampy.

                   Et le chasteau de l’Escluse sur mer
20               Dreça, et fist Ardre a bien maintenue,
                   Et Audruich et Le Planque ordonner.
                   Sceut bien aussi garder la gent menue :
                   Li Roys amer le devoit.
                   Picardie bien plaindre le devroit,
25               Therouenne, Saint Omer et aussi
                   Flandre[3] et Artois, et chascun qui congnoit                4c
                   Le bon prodomme et chevalier Sampy.

                   L’envoy

                   Prince, en honeur voult tousjours labourer,
                   Et loyaument tout son temps vous servi,
30               Sanz grant tresor ne grant terre[4] acquester,
                   Le bon prodomme et chevalier Sampy.

[1] Ms. tous dieux

[2] Ms. forteresce

[3] Ms. Flandres

[4] Ms. grant terre ne grant tresor