Balade 11 : Qui maison a de grant anceserie (XI)

Autre Balade

                   Qui maison a de grant anceserie
                   Et de long temps, dont il porte le non,
                   Duchié, conté, royaume ou seignourie,
                   Le bien garder et maintenir est bon.
5                 Ne ja ne doit, pour acquerir renon,
                   Celle laissier pour faire doubteus change.
                   Car cellui prant dolereuse parson
                   Qui son bien laist pour convoitier l’estrange.

                   Car le certain nul temps ne se varie
10                Que li homs tient, fors que par l’achoison
                   De convoitier le bien qui siens n’est mie.
                   Qui veult avoir l’autrui contre Raison
                   Qui le deffent, et en une saison,
                   Par son pechié pert son bien, sa louenge.
15                Ainsi souvent maint tout perdre voit on,
                   Qui son bien lait pour convoitier l’estrange.

                   Souffisance est tressaincte et bonne vie,
                   Et convoitier usaige de larron.
                   A nul ne puet valoir mauvaise envie,
20               Fors qu’elle fait honte et confusion,
                   Perdre et perirr a maint sa region.
                   Garde chascuns que son propre ne change,
                   Souffise lui : cilz pert possession[1]
                   Qui son bien laist pour convoitier l’estrange.

                   L’envoy

25               Princes, foulz est qui a noble maison,
                   Et par non sens la change a une grange.
                   Lors est chetis, c’est ma conclusion,                             4a
                   Qui son bien lait pour convoitier l’estrange.

[1] Ms. sa possession