Balade 10 : Verité vi qui s’estoit embatue (X)
Balade
Verité vi qui s’estoit embatue
En un pais ou Envie regnoit.
Avarice l’a de moult pres tenue
Qui de tous poins le pais destruisoit.
5 Par Convoitier nulz hom n’y habitoit,
Car d’oir voir, ces deux n’orent l’usaige,
Foulz y ont lieu et non mie [li] saige.
Si fut adonc celle terre envahie,
Et perdit moult par Orgueil, par Oultrage :
10 Par Convoitier mainte terre est perie.
Veritéz de parler lors s’esvertue,
Et des Rommains un exemple monstroit
Qui la terre ont du monde conquerue.
Au commun bien [la] chascuns entendoit.
15 Aux bons amer, a vaillance tendoit
Un chascun d’eulx, sanz orgueil de parage.
Honouréz fut cilz qui fist vassellage,
Et qui ot sens mis ou livre de vie.
Lors conquirent du monde l’eritage :
20 Par Convoitier mainte terre est perie.
Tant comme ilz ont ceste loy maintenue,
Furent seigneur, nul ne les contrestoit.
Mais quant leur fut Convoitise venue,
L’en les hay, ne nulz ne les amoit.
25 Lors perdirent tout ce qui leur estoit.
Par Convoitier, par Orgueil, leur barnage
Se deperit, mis furent en servage :
Par cest rois poins fina leur seigneurie.
Plus ne vous di, adviséz ce langage :
30 Par Convoitier mainte terre est perie.
L’envoy
Princes, quant Verité fut[1] debatue, 3d
De ces trois fut durement assaillie.
Et pour dire fut durement batue :
Par Convoitier mainte terre est perie.
[1] Ms. se fut
