Balade 3 : Cilz qui a chois de prandre et departir (III)
Balade
Cilz qui a chois de prandre et departir
N’est pas saiges, s’il ne prant le meilleur.
Pour ce voult Dieux le ciel prandre et choisir,
Et la se tient com souverain seigneur :
5 Aux hommes voult la terre de labeur
Ça jus laissier, et se tint au plus hault.
La li fait on, chascun jour, maint assault :
Regniéz [est], maugriéz et laidis,
Et a telz gens dit, car d’eulx ne li chaut :
10 Ja riches homs n’yra en paradis.
Car riches veult les autres subvertir
Et tout avoir. Prandre aux povres le leur,
Trop convoitier, faire chascun martir,
Sans regarder n’a pitié n’a honeur,
15 Sanz Dieu doubter, sanz raison, sanz couleur
Que riches ait, qui le povre homme assault.
Ainsi regner en ce monde lui fault, 1d
Par son pouoir, de[sur] povre toudis,
En esperant ce mot qui petit vault :
20 Ja riches homs n’yra en paradis.
Il soufist bien de ces joies sentir
Mondainement, et qu’il tiengne en cremeur
Les basses gens ; qu’il[1] se face cremir,
Qu’il ait argent, or, joyauls et la fleur
25 Des richesces dont autres ont doleur.
Qui ainsi fait, on le tient pour vassault,
Mais, en la fin, leur faurra faire un sault
Dont la mort fait tumer les plus hardis
En l’infernal palut, par leur default :
30 Ja riches homs n’ira en paradis.
L’envoy
Princes, la part du ciel est la meilleur,
Pour ce la prinst Nostres Sires jadis,
Et la terre est aux hommes, la pieur.
Ja riches homs n’yra en paradis.
[1] Ms. et qu’il
